അലക്ഷ്യം

വെറുതേയീറൻ കാറ്റിൽ

അലയും മേഘക്കീറിൽ

എഴുതാനാകുന്നീലെൻ

ഹൃദയം പേനത്തുമ്പാൽ

മറവിക്കടൽ താണ്ടി-

യണയും സുഗന്ധത്താൽ

പൊതിയാനാകുന്നീലെൻ

സ്മരണാസമ്മാനങ്ങൾ 

പൊഴിയും തൂവൽ കൊണ്ടും 

തഴുകാൻ ഭയം നേർത്ത 

തരളസ്വപ്നങ്ങളാൽ

തീർത്ത മൻമനോരഥം

പിരിയും നേരം പോലും

പറയാൻ വാക്കില്ലാതെ 

ഉഴറുന്നുവെൻ ജീവൻ

പിൻവിളി കാതോർക്കുന്നു

നിഴലും വെളിച്ചവും 

ഇഴുകിച്ചേരും അഴി-

മുഖവും തേടിത്തേടി-

ത്തുഴയും തോണിക്കാരാ

പകരത്തിനായല്ലാതൊ-

ഴുകും പുഴക്കെന്തേ

കടലിന്നുപ്പിൽ ചേർന്നു

കുഴയാൻ  ഇന്നും യോഗം

നിലവിൽ പാടം താണ്ടി

വരുമാ ധനക്കുളിർ-

തിരുവാതിരക്കാറ്റി-

നെന്തിനീ അനാഥത്വം

കെടുതിക്കാലങ്ങളിൽ

പൂത്തുകായ്ച്ചൊരീ മരം

ഉളിയാൽ ചീന്തിച്ചീന്തി

തീർപ്പതേതൊരു തോണി

ഒറ്റയായ് നീ പാടുന്ന

പാട്ടുകൾ ലയിക്കുന്ന 

പുഴ തൻ ഓളങ്ങളിൽ 

നിലവിൻ ചാഞ്ചാട്ടമോ

ഒഴുകിച്ചേരും കടൽ-

ക്കരയിൽ കാക്കുന്നതെൻ

മൊഴിയോ പാട്ടോ വെറും
പൊട്ടിയ കുപ്പിച്ചില്ലോ 

വെറുതേയീറൻ കാറ്റിൽ

അലയും മേഘക്കീറിൽ

എഴുതാൻ ശ്രമിപ്പതെൻ 

ഉണ്മയോ ഞാനാം പൊയ്യോ