ചതുപ്പുകള്‍ തിരിച്ചറിയാന്‍

ചതുപ്പുകള്‍ തിരിച്ചറിയാന്‍

ഒന്നുകില്‍

കൈതക്കാട്ടില്‍ ഒളിച്ചിരിക്കാം,

മുന്‍പേ പോയവന്റെ

ഗതിയെന്തെന്നു നോക്കാം..

കല്ലെറിഞ്ഞാഴമളക്കാം,

കണ്ണടച്ചുള്ളില്‍

ഇഷ്ടദൈവത്തിനു നേര്‍ച്ച

ഏകി, സ്വയമിറങ്ങാം,

കൈയിലെ വടി കുത്തിനോക്കാം...

കാനല്‍ വീഴുന്ന മണ്ണിനോട്

ചോദിച്ചു നോക്കാം,

കാതില്‍ കുറുകുന്ന കാറ്റിനോ-

ടാരാഞ്ഞു നോക്കാം,

കൈയിലെ നാണയം 

കറക്കിയെറിഞ്ഞു നോക്കാം...

ചതുപ്പുകള്‍ തിരിച്ചറിയാന്‍

കഴിയാതെ മുങ്ങിച്ചാവുന്നേരം

നശിച്ച ലോകത്തിന്നൊരു

കവിതയെഴുതിക്കൊടുക്കാം......