അരുണാചലം ചെന്നു കാണൂ

 അരുണാചലം ചെന്നു കാണൂ
അവിടെ കുടികൊള്ളുമാത്മസ്വരൂപത്തിൽ വാണ
രമണൻ്റെ പാദത്തിൽ വീണു
സ്വയമറിയുവാൻ ഗുരുനാഥ ചരണത്തിൽ വാണു
അരുണാചലം ചെന്നു കാണൂ

അഹമെന്നതിൻ വേരു തേടൂ
ചിന്ത വളരുമ്പൊഴും നിത്യ മൗനം ഭജിക്കൂ
വെളിയിൽ കൊടുങ്കാറ്റടിക്കേ നിൻ്റെ
ഉയിരിൻ്റെയറയിൽ ചിദാനന്ദത്തിലാണു
അരുണാചലം ചെന്നു കാണൂ

നിത്യമേകം ആത്മവസ്തു
മറ്റു ചുറ്റിലുമുള്ളവയെന്നു നിനക്കിൽ
തെറ്റെന്നുറപ്പിച്ചു നിത്യം സത്യ
സാക്ഷാത്കൃതൻ ഗുരുനാഥനെക്കാണാൻ
അരുണാചലം ചെന്നു കാണൂ

കണ്ടതിന്നപ്പുറം പോകാൻ
കണ്ടതാരെന്ന ചോദ്യത്തിനുത്തരം തേടാൻ
കണ്ണിൻ്റെ കണ്ണിൻ്റെ കണ്ണാം
തൻ്റെയുണ്മയെക്കണ്ടിങ്ങറിവതിനായി
അരുണാചലം ചെന്നു കാണൂ

പുലരിയാം പിച്ചകമാല
മാറിലണിയുന്നൊരഗ്നിസ്വരൂപനെക്കാണാൻ
സ്മരണയാൽ കൈവല്യമേകും തിരു
പ്പുകഴേന്തും അരുണാചലേശനെക്കാണാൻ
അരുണാചലം ചെന്നു കാണൂ

സന്ധ്യകൾ നിറമാല ചാർത്തും
തൃക്കാർത്തികാപൗർണ്ണമിപ്പാൽ ധാരയേകും
ജീവൻ്റെ മൺചിരാതിന്മേൽ ആത്മ
ജ്ഞാനമാം തദ്വന ജ്യോതിസ്സിനായി
അരുണാചലം ചെന്നു കാണൂ

ആകാശവീഥിയിൽ പൂക്കൾ
പോലെ താരകങ്ങൾ പൂത്തുനിൽക്കുന്ന രാവിൽ
ആത്മശൃംഗത്തിനു ചുറ്റും
വലംവെച്ചമൃതത്തിൻ്റെ പൂന്തേൻ കുടിക്കാൻ
അരുണാചലം ചെന്നു കാണൂ

ധനമദമാനത്തിൽ മുങ്ങി
ജീവനവിരാമമാം ജന്മപാശത്തിൽ തങ്ങി
സ്വയമറിയാതെപ്പരുങ്ങി -
യെങ്ങുമഭയമില്ലാതുള്ളു വിങ്ങിക്കുഴങ്ങേ
അരുണാചലം ചെന്നു കാണൂ

പിഴകൾ പൊറുത്തെൻ്റെ പ്രാണൻ
തൻ്റെ ചരണാന്തികത്തിൽ അനാകുലം ചേർത്തു
വഴി കാട്ടിടും ഗുരുനാഥൻ
രാമകൃഷ്ണനോ രമണനോ ശിവനോ നീ താനോ
അരുണാചലം ചെന്നു കാണൂ