ഇനിയും ഞാന്‍.........

11/27/09 നു എഴുതിയ കവിത...
----------------------------------
എത്ര ജീവിതാസക്തികള്‍ പിന്നെയും

മാര്‍ത്തടത്തില്‍ നഖങ്ങളാഴ്ത്തീടവേ

എത്ര ഭ്രാന്തമാം മോഹങ്ങള്‍ പിന്നെയും

കൂര്‍ത്ത മുള്ള് പോല്‍ എന്നെ നോവിക്കവേ

ശൂന്യമാമെന്‍റെ ജീവിതം പിന്നെയും

വന്യമായ വികാരങ്ങള്‍ തേടവേ

അര്‍ത്ഥമില്ലാത്ത വാക്കുകളെന്‍ നാവില്‍

വ്യര്‍ത്ഥമാമൊരു കാവ്യം രചിക്കവേ

മൌനമൂറുന്ന വാക്കുകള്‍ക്കപ്പുറം

കാവ്യ-നാദ സരസ്സുകള്‍ക്കപ്പുറം

കണ്ണുനീര്‍ വീണു പൊള്ളിയൊരെന്‍റെ കൈ-

ത്തണ്ട നിങ്ങളില്‍ ആരു ശ്രദ്ധിച്ചുവോ

അറ്റു വീണൊരു ഗൌളി തന്‍ വാലുപോല്‍

എത്ര നേരമോ എന്‍റെയീ സ്പന്ദനം

വറ്റി മാഞ്ഞു പോം മഞ്ഞിന്‍റെ തുള്ളി പോല്‍

എത്ര നേരമീ ശീതസംസ്പര്‍ശനം

വര്‍ണ്ണമേഴും വിരിച്ചു നില്‍ക്കും മഴ-

വില്ലു പോലെ മറഞ്ഞിരുന്നെങ്കില്‍ ഞാന്‍

മിന്നലായി ഈ ഭൂമിയെ ഉമ്മ വെ-

ച്ചൊന്നൊളി വീശി മാഞ്ഞു പോയെങ്കില്‍ ഞാന്‍