കാവ്യം വിടര്‍ന്നൂ....

സന്ധ്യ കുളിച്ചു വരുന്ന വഴിക്കെന്‍

ചുണ്ടില്‍ നല്‍കിയ മാധുര്യം

ഉള്ളില്‍ പെയ്തൊരു  മഴയില്‍ കിനാവില്‍

പീലി നിവര്‍ത്തിയ മഴവില്ലായ്

ചെന്താമരയിതളായി, നിലാവിന്‍

ചെമ്പനിനീര്‍പ്പൂ മണമായി

നിശ്വാസങ്ങളുതിര്‍ക്കും കാറ്റിന്‍

നെഞ്ചിലെ ഗോരോചനമായി

വെയിലു തളര്‍ന്നു മടങ്ങും സന്ധ്യയി-

ലുയരും നാമധ്വനിയായി

കനലു തിളങ്ങും കണ്‍കളില്‍ സ്നേഹ-

പ്പുലര്‍കാലത്തിന്‍ തണുവായി

വേദനയറിയാ വേദാന്തപ്പൊരു-

ളൂറിന ചിന്താസരണികളായ്

മാടി വിളിക്കും പോന്നമ്പലമല-

മേടുകളേകും സാന്ത്വനമായ്

ജീവനിലുണ്ടൊരു ചെങ്കദളിക്കുല

പോലെയൊരാതിര മലര്‍ പോലെ

സാന്ദ്രം നിറയും കടല്‍ പോല്‍, പ്രാണനി-

ലാനന്ദത്തിന്നല പോലെ,

ഏതോ ദിവ്യാരാമത്തിന്‍ പ്രഭ

തൂകിടുമോമന മുഖമോടെ

ഏതോ സ്വപ്നം പോലെ, വിടര്‍ന്നൂ

കാവ്യം, നിന്‍ മൃദു ചിരി പോലെ.