കല്പകത്തൈ....

കല്പതരുദിനാശംസകൾ(ജനുവരി 1 )

---------------------------------------

അനാദിയാകും വേദത്തി-

ന്നാഴത്തിൽ വേരു താഴ്ത്തി നീ

വലിച്ചെടുത്ത സത്യത്തിൻ

പുഷ്ടിയാൽ പൂത്ത വാക്കുകൾ 

നിൻ പാദം ചിന്ത ചെയ്‌തെന്നും

കൈവല്യമണയാൻ തപം 

ചെയ്യുന്നു യോഗിവൃന്ദങ്ങൾ 

വല്മീകത്തിന്റെയുള്ളിലായ്

അതിസാധാരണമാം മട്ടിൽ

ഉള്ളിലെ കാമ്പു കാട്ടിടാ-

ടേറും കൗശലമോടെ നിൻ 

ലീലയാൽ തീർത്ത തോൽപ്പുറം

ദുഷ്കരം ശുദ്ധശാസ്ത്രത്തിൻ 

പാതയിൽ സഞ്ചരിച്ചു തൻ 

ഉടലിൽ സഞ്ചയിച്ചോരു

സത്യാർത്ഥത്തിൻറെ കാതലും

വൈവിധ്യപൂർണ്ണമാം പാത-

യോരോന്നിൻ പരിപൂർണ്ണത 

നേടി നീ നീട്ടി നിൽക്കുന്നൊ -

രസംഖ്യം പൂത്ത ചില്ലകൾ

നിൻ സുഗന്ധം ജഗത്താകെ

വിതറാനായി മൊട്ടിട്ടു

വിടർന്നു നിൻ വചോഗന്ധ-

വാഹിയാം ശിഷ്യസഞ്ചയം 

മധുവിൻ രുചിഗന്ധങ്ങൾ

അനുഭൂതി വിഭൂതികൾ

നുകർന്നു മത്തരായ് മൂളും

ഭക്തരാകുന്ന വണ്ടുകൾ

ഇരുണ്ട ജീവമാർഗ്ഗത്തി-

ന്നാന്ധ്യമെല്ലാമകറ്റുവാൻ 

നിൻ കണ്ണിൻ ദ്യുതി പാറുന്നു 

മിന്നാമിന്നികളായ് സദാ

ഭക്തിയും മുക്തിയും - തൃപ്തി 

വരുത്തും ഫലസഞ്ചയം 

ലോകർക്കായ് തൂങ്ങിയാടുന്നു

കൈയെത്തുമുയരത്തിലായ് 

നൂറായിരക്കണക്കായി

നിന്റെ നാവു മൊഴിഞ്ഞതാം

വചോപർണ്ണങ്ങൾ വീശുന്നു 

ആശ്വാസക്കുളിർകാറ്റിതാ

ഭഗവൻ! ഭവചക്രത്തിൽ-

പെട്ടുഴറും ജീവരാശികൾ-

ക്കമൃതൂട്ടുന്ന നീ, ഞങ്ങൾ 

ഇളവേൽക്കും മഹാമരം 

സുഖദുഃഖങ്ങൾ തന്നാഴി

മഥനം ഞങ്ങൾ ചെയ്യവേ

കൃപയാലുദയം ചെയ്ത 

ഇച്ഛ തീർക്കുന്ന കല്പകം

ചോദിക്കുന്നതിലേറെത്തൻ

കാരുണ്യം കൊണ്ടു ഞങ്ങളിൽ

വർഷിക്കും കല്പകത്തൈയേ 

രാമകൃഷ്ണാ ജയിക്കുക!!

അഹേതുകദയാസിന്ധോ

അപ്രാർത്ഥിതവരപ്രദ

അവാങ്ഗോചര വിശ്വാത്മൻ

അവതാരവരിഷ്ഠാ തൊഴാം!!!

**https://en.wikipedia.org/wiki/Kalpataru_Day